«Қуръон ва суннатдаги илмий мўъжизалар»

«Қуръон ва суннатдаги илмий мўъжизалар»

Бисмиллаҳир роҳманир роҳийм

МУҚАДДИМА

Қуръонни инсоният учун қиёматгача боқий ҳидоят маёғи, барчани ожиз қолдирувчи баёни, мислсиз мўъжизалар кони ва икки дунё саодатига элтувчи дастурул амали қилиб нозил этган Аллоҳ таолога беадад ҳамду санолар бўлсин!

Қуръонни Роббул оламиндан қабул қилиб олган, уни бутун оламларга омонат ила етказган, ҳам ўқишни, ҳам уқишни ўргатган, уни ўз суннатлари ила ҳаётга тамомила татбиқ этиб кўрсатган ва илмий мўъжизаларни баён этган севимли Пайғамбаримиз, Аллоҳ таолонинг ҳабиби Муҳаммад Аминга энг пок ва энг юксак салавоту дурудлар бўлсин!

Гоҳида баъзи бир ҳодиса ёки гап-сўзлар ўзидан кўра каттароқ нарсаларга сабаб бўлади. Бундай бўлиши Аллоҳ таолонинг ҳикмати бўлса керак. Қабулимга кирган бир киши ўз танишларининг динимизни ўрганиб боришдаги ихлослари, ҳаракатлари ва шунга ўхшаш гапларни айтиб бўлгандан кейин асосий мақсадга кўчди. Ўз танишларидан баъзилари динимиз таълимотларини ўрганиб, қабул қилишлари билан бирга вафот этгандан кейин қайта тирилиш ҳақидаги эътиқодни қабул қилмаётганлари, уларга бу ҳақиқатни англатиш борасидаги уринишлар беҳуда кетаётгани борасида афсус-надомат билан гапирди. Мен у кишига керакли гапларни айтдим. Нималарни тушунтириш кераклигини билдирдим. Зиёратчи қаноат ҳосил қилиб, чиқиб кетди.

Кейин ўзим ўйланиб қолдим. Мазкур одамлар нима учун ўлгандан кейин қайта тирилиш ҳақидаги ақийдани инкор қилишмоқда экан? Аллоҳ таолога ишонса, Қуръони Каримга ишонса, Муҳаммад Мустафо соллаллоҳу алайҳи васалламга ишонса, нима учун Аллоҳ таоло айтган, Қуръони Карим айтган, Муҳаммад Мустафо соллаллоҳу алайҳи васаллам айтган ўлгандан кейин қайта тирилиш ақийдасини инкор қиладилар? Эҳтимол, бу ҳақдаги маълумотлар уларга тўғри етмаган бўлса керак. Ёки бирор киши уларга бу борада шубҳали гапларни айтиб, фикрларини ўзгартирдимикан? Нима бўлганда ҳам, бу ташвишли ҳолат эди. Ҳалиги савол билан келган одамга «Ўша ўлгандан кейин қайта тирилишини инкор қилаётган одамларни олиб келинг», демабман ҳам.

Охири бу масалани батафсил баён қилиб, алоҳида мақола ёзиш, шунга ўхшаган бошқа долзарб масалаларни жамлаб, бир китоб қилиш режаси тузилди. Аммо мазкур долзарб масалаларнинг ўзи кичикроқ бир китоб бўлиб қолди. Мавзулар турлича бўлгани учун ўлгандан кейин қайта тирилиш ақийдаси борасидаги мақола уларга унча мос келмай қолди. Мазкур масалани ёритиш пайтида, бугунги кунимиздаги илмий кашфиётлар ўлгандан кейин қайта тирилиш ҳақиқат эканини исботлагани ҳақидаги маълумотларни тақдим қилиш жараёнида ўз-ўзидан Қуръон ва суннатдаги илмий мўъжизалар мавзуси кўтарилиб қолди. Ўзи анчадан буён шу мавзуда ҳам бир китоб қилиш режаси бор эди. Авваллари турли китобларимизда, жойи келганда бу мавзу эслаб ўтилган ва баъзи маълумотлар ҳам тақдим этилган эди. Шунинг учун ўлимдан сўнг қайта тирилиш ҳақидаги мақолани ўз ичига олган «Қуръон ва суннатдаги илмий мўъжизалар» деган китоб тайёрлаш режаси пайдо бўлди ва Аллоҳ насиб қилиб, бу режа амалга ошди.

Баъзида мавзуни умумий ёритишга ҳаракат қилган бўлсак, баъзида катта мавзуларни алоҳида сарлавҳалар остида баён қилишга тўғри келди. Шу боис баъзи маълумот ва жумлалар такрор келиб қолган бўлса, муҳтарам ва азиз ўқувчиларимиздан узр сўраймиз.

Аллоҳ таоло бу ожизона ва камтарона амалга оширилган ишни барчамиз учун фойдали қилсин! Ундаги маълумотларни динимизни, Қуръони Каримни, Расулуллоҳ соллаллоҳу алайҳи васалламнинг суннатларини ва шариатимизни яхшироқ, теранроқ ва пухтароқ англаб етишимизга восита қилсин! Ушбу ғоятда аҳамиятли ишда Аллоҳ таолонинг Ўзи бизларга ёрдам берсин!

Шайх Муҳаммад Содиқ Муҳаммад Юсуф

Муаллиф: Шайх Муҳаммад Содиқ Муҳаммад Юсуф
Нашриёт: «Hilol-Nashr» нашриёт-матбааси
Сана: 2023 йил (2019, 2021,2022)
Ҳажми: 296 бет
ISBN: 978-9943-5980-6-5
Ўлчами: 84×108 1/32‎
Муқоваси: қаттиқ