Аллоҳ таоло имконияти етган мусулмонларга умрида бир марта ҳаж қилишларини фарз қилган. Шундай экан, бу улуғ ибодатни адо этишда инсон бирор аниқ кўрсатма ёки йўлбошчига эхтиёж сезади. Зиёратчиларга элликбоши, мингбошиларнинг тайин қилиниши мана шу эхтиёж сабабидандир. Қўлингиздаги рисола ҳам зиёратчиларга кўрсатма тариқасида қўлланма бўлиб, унга ҳаж амалларини бажариш давомида айтиладиган зикр ва дуолар киритилган.

Ҳожиларга эслатма: Ҳаж зиёрати пайтида зикр ва дуолар қилиш суннат амал ҳисобланади. Чунки Набий соллаллоҳу алайҳи васаллам ҳажнинг ҳар соатини ғанимат билиб, Аллоҳ таолога кўп дуо ва илтижолар қилганлар. Шунинг учун ушбу сермашаққат ибодат вақтида ҳар бир ҳожи кучи етганича дуода бўлса, ажру савобга эришади. Бордию имкон бўлмай, баъзи дуолар ўқилмай қолса, бу билан зиёратчилар қилган ҳаж ибодатларимиз қабул бўлмади деб асло ноумид бўлишмасин. Зеро, Аллоҳ таоло Ўз бандаларини тоқатларидан ташқари амалга буюрмаган. Ихлос билан қилинадиган барча ибодатлар, иншааллоҳ, қабул бўлади.