«Марваридлар шодаси»

Муҳтарама опа-сингиллар! Қўлингиздаги мазкур китоб урдунлик машҳур устоз, ҳанафий фиқҳининг забардаст олими доктор Салоҳ Абул Ҳож Ҳанафий ҳазратларининг қаламига мансуб «Акаа-лилул-маас фии қовааъидил-ҳайзи ван-нифаас» («Ҳайз ва нифос қоидаларига оид олмос тожлар») номли китобнинг ўзбек тилидаги таржимасидир. Бу асар «Хадичаи Кубро» ўрта махсус ислом таълим муассасасининг тажрибали, малакали ўқитувчилари томонидан таржима қилинди.

Бугунги кунда аёллар орасида тарқалган бидъат-хурофотларнинг сабаби диний-маърифий саводсизлик экани барчамизга маълум. Афсуски, шариатимизнинг аёлларга хос бўлган, билиш фарзи айн бўлган аҳкомларини билмаслик нафақат оилада, балки бутун жамиятда жиддий муаммолар келиб чиқишига сабаб бўлмоқда. Ана шундай энг муҳим масалалардан бири аёлларга хос поклик масаласидир. Зеро, муқаддас динимиз покликка асосланган. Шу боис инсондан нафақат жисмоний, балки маънавий покликни талаб қиладиган Ислом динида жисмоний поклик масалалари доим энг биринчи навбатда ўрганилади ва ўргатилади. Қолаверса, ҳайз ва нифос масаласи фақат аёллар эмас, балки эркаклар ҳам албатта билиши шарт бўлган илмдир, буни билиш ёшу қарига, айниқса, оила қуришга тайёрланаётган йигит-қизларимизга фарзи айндир. Аёлларнинг хайз ва нифосга тегишли илмларни билиб, унга қатъий амал қилишлари ибодат даражасидаги муҳим масала экан, мазкур китобнинг ёзилиши ва унинг ўзбек китобхонлар учун таржима қилиниши айни муддаодир, нур устига нурдир.

Китобда ҳайз ва нифос масаласига оид энг муҳим қоидалар баён қилиниб, сўнг уларга тегишли фатволар берилган, китоб охирида эса мавзу доирасида савол- жавоблар келтирилган. Эр-хотинлик муносабатлари, баркамол авлод тарбияси сизу биз аёлларнинг бу илмни чуқур били-шимиз ва унга амал қилишимизга боғлиқ экан, мазкур рисола бу борада барчамизни икки дунё саодатига эриштирувчи манфаатли илм манбаи бўлишини Аллоҳ таолодан сўраб қоламиз.

Нозима Ибрагимова
Тарих фанлари бўйича фалсафа доктори